Xorijiy tillar kafedrasi

Yadgarov Abduvosit Islamovich

Alisher Navoiy nomidagi Toshkent davlat oʻzbek tili va adabiyoti universiteti akademik litsey kafedra mudiri.

     Akademik litsey Xorijiy tillar kafedrasi chet tili fanlarini o‘qitishning asosiy maqsadi: o‘rganuvchilarning ko‘p madaniyatli dunyoda kundalik, ilmiy va kasbga oid sohalarda faoliyat olib borishi uchun chet tilida kommunikativ kompetensiyasini shakllantirish, chet tili bo‘yicha egallagan bilim, ko‘nikma va malakalarini muloqot jarayonida qo‘llash qobiliyatini hamda xorijiy tillarda og‘zaki, yozma nutq ko‘nikmalarini va imlo savodxonligini rivojlantirishdan iborat. Akademik litsey o‘quvchilarining xorijiy tillarni o‘rganishda tinglab tushunish, gapirish, o‘qish va yozish ko‘nikmalariga asoslangan holda darslar olib borilishi ko‘zda tutilgan. Bugungi kunda xorijiy tillarni egallash, avvalo, foydalanuvchi sifatida kelajakda o‘rta maxsus kasb-hunar ta’limi tizimi bitiruvchilarining kichik mutaxassis sifatida ishlashi, erkin muloqot qila olishiga imkon yaratadi.
    Xorijiy tillar kafedrasida 16 nafar o‘qituvchi mavjud bo‘lib, 9 nafar ingliz tili, 3 nafar rus tili,1 nafar fransuz tili, 1 nafar ispan tili, 1 nafar xitoy tili, 1 nafar turk tili fani o‘qituvchilari faoliyat olib borishmoqda. O‘zbekiston Respublikasi Prezidentining “O‘zbekiston Respublikasida xorijiy tillarni o‘rganishni ommalashtirish faoliyatini sifat jihatidan yangi bosqichga olib chiqish chora-tadbirlari” to‘g‘risidagi 2021-yil 19-maydagi PQ-5117-sonli qarori ijrosini ta’minlash maqsadida akademik litsey barcha chet tili o‘qituvchilarida chet tilini bilish bo‘yicha xalqaro va milliy darajadagi C1 sertifikatlari mavjud.
    Kafedra Alisher Navoiy nomidagi Toshkent davlat o‘zbek tili va adabiyoti universitetining “Tarjima nazariyasi va amaliyoti” kafedrasi bilan o‘zaro shartnoma o‘rnatgan bo‘lib, universitet professor-o‘qituvchilari bilan mahorat darslari, uchrashuvlar, davra suhbatlari tashkil etishadi. Ikkinchi xorijiy til sifatida o‘qitiladigan turk tilini xorijlik mutaxassis o‘qituvchi, professor Huseyn Kaba olib boradi.
    Bundan tashqari, akademik litseyda koreys tilini o‘rgatish maqsadida koreyalik professor-o‘qituvchilar bilan hamkorlik olib borilmoqda. Koreyaning Hancom academy" bosh direktori Kvan-Xon Li, ijrochi direktori Pak Kinxyon, SEMYUNG universiteti hamda SINGANGI universiteti xalqaro bo'lim boshlig'i, professor janob Lee, Hosan universiteti rahbari Mr Kim Jae Hyun va Ms Kim Sunmi, Koreya Plan Mentor (KMP) tomonidan ta’lim va almashinuv, IT va sun’iy intellekt texnologiyalarini rivojlantirish, shuningdek, madaniy almashinuv sohasida hamkorlik shartnomalari imzolangan. Bugungi kunda koreys tilini o‘rgatish maqsadida Koreya davlati universitetlari hamkorligida ochilgan to‘garak faoliyat yuritmoqda.